Стихи

"ТЮЗЛЮК ТЮЗДЕ КЪАЛМАЗ"

Бир кёб зулму сынагъанды халкъым.
Энтда турады табалмай хакъын.
Бюгюн да тюлдю башына эркин.
Джангы сынаула келтиреди хар кюн.

Тюзлени къой, энди тауланы да,
Тауланы да сыйыралла бизден.
Ёлгенлеге къоша сауланы да,
Айырадыла джерибизден.

Алай а,
Туугъан джер ючюн, Ата джурт ючюн
Таулу халкъ хазырды турургъа ёрге:
Не джуртубузгъа ие боллукъбуз,
Не шейит болуб кирликбиз кёрге.

Акъсакъалла тарталла мынчакъ:
«Тюзде къалмаз тюзлюгю тюзню».
«Къындан чыкъмасын,- дейле,- бычакъ»,
Сабырлыкъгъа чакъыра бизни.

Ала джанларын этелле къурман.
«Ким, не ючюн?» - билесе, сорма.
Ёзге аланы да тюнгюлтсе кърал,
Тауусулса хар не тюрлю амал,
Аллах буюргъан боллукъду сора.

***

Бу назмуну айтама алагъа –
Хакъ ючюн кюрешген акъсакъаллагъа.
Сизнича адамлары болгъан халкъ,
Динин, тилин, джуртун да сакълар.

Джаш тёлюге болгъансыз юлгю.
Турлукъбуз ёрге берсегиз белги.
Сизни бладыла Татаркъан, Джаттай.
Сизни блады джулдуз бла Ай.

Сизни бладыла Аллах, Адам.
Хорларыкъсыз, къыйналса да джан.
Бош салмагъансыз Москвада бетджан,
Керти адамлары халкъыбызны.
Бир кишиге бермезбиз, огъай,
Аллах берген хакъыбызны.

Хакъ байракъны тутханла ёрге,
Турлукъсуз халкъны эсинде, тёрде.
Бютеу дуния къарайды сизге:
Инша Аллах, Тюзлюк къалмаз тюзде.